Anak ni Samboy Lim naka-ginto!
MANILA, Philippines — Puwedeng-puwede na siyang tawanging Miss Perfect.
Maganda, matalino at mahusay.
Pinatunayan ito ni karateka Jamie Christine Lim matapos masungkit ang gintong medalya sa women’s +61 kg kumite ng 2019 Southeast Asian Games kahapon sa World Trade Center sa Pasay City.
Pinataob ni Lim si Zefanya Ceyco ng Indonesia sa pamamagitan ng 2-1 desisyon sa gold-medal match.
Sa kabila ng kaliwa’t kanang tagumpay, nananatiling mababa ang kalooban ni Lim.
Nagtapos itong summa cum laude sa kursong BS Mathematics sa University of the Philippines-Diliman.
“Karatedo is really in my heart. And with the 2019 SEA Games in the Philippines, how special it is right? The time is perfect. I just graduated and got my goal in academics,” ani Lim.
Nananalaytay sa dugo ni Lim ang pagiging atleta. At para sa kaalaman ng lahat, si Lim ay anak ni dating PBA star Samboy Lim.
“I think the signs are calling me to come back so I just went for it. I gave my all and it paid off,” aniya.
Nais ni Lim na ibahagi ang kanyang tagumpay sa kanyang pamilya.
Ang kanyang summa cum laude medal sa kanyang ina at ang kanyang SEA Games gold medal para sa ama na makailang ulit nang naging miyembro ng national team noong naglalaro pa ito.
“Summa cum laude is for mom, SEA Games gold for dad. I can’t believe that both of them happened this year. I’m just so grateful,” dagdag ni Lim.
Tinalo ni Lim sina Audrey Japyus ng Malaysia, 7-3, sa quarterfinals at Thu Thao Bui ng Vietnam, 5-1, sa semifinals.
Ito ang ikalawang ginto ng karatedo team matapos pagreynahan ni Junna Tsukii ang women’s -50 kg kumite.
- Latest