It’s all about the attitude
Ang salitang “attitude” ay tumutukoy sa kalagayan ng pag-iisip at pagkilos bunga ng damdaming naghahari sa isang tao, sa takdang oras o panahon.
Ang attitude ay maaaring positibo o negatibo.
Bakit ito ang paksa ko? Dahil ang salitang attitude ay napakamahalaga para sa mga atletang katulad namin.
Sa araw-araw na ginawa ng Diyos, iba-iba ang laban ng mga tao.
Kaming mga atleta hindi lang laban sa mahirap na ensayo, sakit at pagod na katawan, at mga laro ang hinaharap namin, may mga personal din kaming laban sa buhay pero kinakaya dahil ang matra namin ay “It’s all about the attitude”.
Noong nakaraang Linggo, nag-team building kami. Sa dalawang araw na iyon mas higit naming nakilala ang isa’t isa dahil sa malalalim na obhektibo ng activities at pagbabahagi ng kuwentong buhay na isinagawa namin.
Iba’t ibang kuwento ng hirap at sarap, pagkadapa at muling pagkabangon, sakit at kilig, lungkot at saya ang ibinahagi.
Halimbawa, kung ako ay mula sa broken family at maaga pa lang ay naging bread winner at independent na, akala ko ako lang iyong ganoon.
Hindi pala ako nag-iisa. Halos lahat pala kami ay kumayod upang maitawid ang pamilya sa hirap.
Halos lahat kami nagtrabaho nang todo sa paglalaro ng volleyball at ginamit ito upang makapagtapos ng libre sa pag-aaral. Halos lahat pala kami may mga kapamilyang may karamdaman na maaaring makapagpahina sa amin dahil mga mahal namin sa buhay ay nahihirapan, ngunit it’s all about the attitude.
Mas pinipili namin magpakatatag para sa kanila, pinipili naming tibayan ang mga sarili kasi kung bibigay kami ay paano na lang sila?
Gayunpaman ay nakakamangha rin iyong kuwento ni Jovelyn Gonzaga dahil sa kabila ng injury sa tuhod na ACL at kahit na kakagaling niya lang sa rehab last year, nailaban niyang maglaro sa dalawang propesyunal na ligang PSL at PVL.
Bagama’t nakakapagod ang araw-araw na laro at ensayo, para sa kanya it’s all about the attitude.
Nasa isip lang ang hirap, nasa tao kung papaano siya magre-react sa mahirap na sitwasyon.
Mas pinipiling pairalin ang positibong atidyud sa kabila ng mahihirap na pagkakataon.
Ganito ang mantra namin sa Women’s Volleyball Team.
Kahit mahirap, kahit nakakapagod, attitude lang katapat niyan. Attitude lang.
- Latest