Clippers wagi sa Celtics sa overtime
LOS ANGELES -- Humataw si guard Lou Williams ng 27 points, habang may pinagsamang 42 markers sina Kawhi Leonard at Paul George para tulungan ang Clippers na takasan ang Boston Celtics, 107-104, sa overtime.
Ito ang unang pagkakataon na nagkasabay maglaro sina Leonard at George.
Umiskor si George ng 25 points para sa Los Angeles at may 17 markers si Leonard na sumupalpal sa panablang three-point shot ni Boston guard Kemba Walker.
Itinaas ng Clippers ang kanilang record sa 9-1 sa kanilang balwarte kontra sa Celtics.
Nakabangon ang Los Angeles mula sa 10-point deficit sa fourth period patungo sa extra period.
Sa overtime ay nagsalpak sina George at Patrick Beverley ng magkasunod na 3-pointer para kunin ang 104-99 abante laban sa Boston.
Nakadikit naman ang Celtics sa 102-104 mula sa basket ni Jayson Tatum.
Muling tumipa si Beverley ng triple sa harap ng Clippers bench para iposte ang 107-102.
Binanderahan ni Tatum ang Boston mula sa kanyang 30 points kasunod ang tig-14 markers nina Marcus Smart at Brad Wanamaker.
Sa Denver, humakot si center Nikola Jokic ng 27 points at 12 rebounds para pamunuan ang Denver sa 105-95 paggupo sa Houston Rockets.
Tinapos ng Nuggets ang eight-game winning streak ng Rockets.
Nagtala si James Harden ng 27 points matapos kumamada ng magkakasunod na higit sa 36 markers sa mga nakaraang panalo ng Houston.
Sa Atlanta, kumolekta si Giannis Antetokounmpo ng 33 points at 11 rebounds at may 28 markers si Eric Bledsoe para ihatid ang Milwaukee Bucks sa 135-127 paggiba sa Hawks.
Ito ang pang-limang sunod na ratsada ng Bucks, naipanalo ang siyam sa kanilang huling 10 laban.
Pinangunahan ni rookie forward De’Andre Hunter ang Atlanta mula sa kanyang career-high 27 points.
Sa Dallas, iniskor ni Luka Doncic ang 33 sa kanyang 35 points sa first half para ihatid ang Mavericks sa 142-94 paggupo sa Golden State Warriors.
- Latest