SMBeer sasagupa sa Gin Kings sa quarters
MANILA, Philippines — Para mapalakas ang kanilang tsansang makopo ang pambihirang PBA Grand Slam ay kailangan munang talunin ng San Miguel ang Barangay Ginebra sa quarterfinals ng 2019 PBA Governor’s Cup.
Ngunit hindi ito madaling gawin.
May bitbit na ‘twice-to-beat’ advantage ang Gin Kings bilang No. 4 team laban sa No. 5 Beermen.
Nahulog ang San Miguel sa nasabing puwesto matapos makalasap ng 109-114 kabiguan sa TNT Katropa noong Miyerkules.
Ang No. 1, 2, 3 at 4 teams ang magkakaroon ng ‘twice-to-beat’ advantage sa quarterfinals laban sa No. 8, 7, 6 at 5 squads, ayon sa pagkakasunod.
Lalabanan ng San Miguel ang Ginebra sa quarterfinals na wala sina Arwind Santos, Kelly Nabong at Ronald Tubid, pinatawan ng SMC management ng indefinite suspension dahil sa gulong nangyari sa kanilang ensayo sangkot si import Dez Wells.
Pinauwi na si Wells at si John Holland ang muling nagsuot ng uniporme ng Beermen sa ikalawang sunod na pagkakataon sa kanilang pagkatalo sa Tropang Texters.
Haharapin naman ng No. 1 NLEX ang No. 8 NorthPort, habang makakasagupa ng No. 2 Meralco ang No. 7 Alaska.
Makakatapat ng No. 3 TNT Katropa ang No. 6 Magnolia, ang nagdedepensa sa titulo ng season-ending conference.
- Latest