Mojdeh 5 ginto ang hinarbat sa Vietnam

MANILA, Philippines — Humakot si Brent International School-Laguna standout Micaela Jasmine Mojdeh ng limang ginto at isang tansong medalya sa 2019 United Nations International School (UNIS) Invitational Swimming Championship na ginanap sa Ciputra sa Hanoi, Vietnam.

Inilabas ng Swimming Pinas ace tanker na si Moj­deh ang buong puwersa nito para masungkit ang Most Outstanding Swimmer award sa girls’ 13-year category.

Mainit na sinimulan ni Mojdeh ang kampanya nito matapos pagreynahan ang 200m freestyle sa pamamagitan ng impresibong dalawang minuto at 17.77 segundo kasunod ang pamamayagpag sa 100m Individual Medley tangan ang 1:10.39.

Hindi pa nag-paawat si Mojdeh nang umani pa ito ng ginto sa 50m butterfly (30.21), 50m breaststroke (37.07) at 100m butterfly (1:04.77) para makumpleto ang five-gold sweep sa kanyang kategorya.

“It’s her first international meet representing Brent International School and we’re happy with the outcome. We want to thank Brent International School for giving proper exposure and for supporting Jasmine,” wika ni Swimming Pinas team manager Joan Melissa Mojdeh.

Nagpasiklab din ang White siblings na sina Heather, Ruben at Hannah na gaya ni Mojdeh ay produkto rin ng Philippine Swimming League (PSL) sa ilalim ng namayapang PSL president Susan Papa.

Sumungkit ng tatlong ginto at isang pilak si Hea­ther sa girls’ 12-year class habang nakahirit naman si Ruben ng dalawang ginto at dalawang pilak sa boys’ 14-year division.

Nanalo si Hea­ther sa 100m butterfly (1:10.12), 100m IM (1:12.48) at 50m butterfly (30.81) habang naka­pilak ito sa 50m backstroke (32.67).

Sa kabilang banda, umukit si Ruben ng ginto sa 100m butterfly (1:04.35) at 100m IM (1:08.08), at dalawang pilak sa 50m freestyle (25.45) at 50m butterfly (28.49).

Nagdagdag naman ng isang pilak si Hannah sa girls’ 7-year 50m freestyle (41.54).