Pamisa laglag sa silver

MANILA, Philippines — Uuwi si national junior boxing team member Eljay Pamisa bitbit ang pilak na medalya sa pagtatapos ng 2019 ASBC Asian Junior Boxing Championships kahapon sa Fujairah, United Arab Emirates.

Umani ang Cagayan de Oro City pride ng split decision loss sa kamay ni Vishwanath Singh ng India sa gold-medal match ng boys’ pinweight (44-46 kg.) division ng torneong may basbas ng Asian Boxing Confederation.

Mainit na sinimulan ni Pamisa ang laban nang makipagsabayan ito sa maliksi ring si Singh kung saan kumunekta ng ilang solidong straight at body shots ang Pinoy fighter.

Ngunit mas naging mabagsik ang Indian pug sa mga sumunod na yugto nang makakuha ito ng ilang pagkakataon para tumama kay Pamisa at tuluyang angkinin ang panalo.

Umabante sa finals si Pamisa matapos ilampaso si Thanakom Aonyaem ng Thailand sa semifinals sa pamamagitan ng 5-0 unanimous decision win.

Nakuha ni Pamisa ang 30-27, 29-28, 30-27, 30-27, 29-28 desisyon mula sa limang mga judges.

Nauna nang tinalo ni Pamisa si Hsu Po-Hao ng Chinese-Taipei sa quarterfinals via 4-1 split decision (29-28, 29-28, 29-28, 30-27, 27-30).

Tuloy ang maningning na kampanya ng Association of Boxing Alliances in the Philipines (ABAP) sa international scene.

Una nang nakaginto si Nesthy Petecio sa AIBA Women’s World Cham­pionship habang naka­pilak naman si Eumir Felix Marcials sa AIBA Men’s World Championships na parehong ginanap sa Russia.