Sweep sasakmalin ng Lions

MANILA, Philippines — Maghaharap ang top seed at undefeated San Beda Red Lions at pumapangalawang Lyceum Pirates ngayon para malaman kung magkakaroon ba ng Final Four o stepladder format sa playoff round sa penultimate day ng elimination sa Season 95 NCAA basketball tournament sa The Arena ng San Juan City.

Ang three-peat cham­pion Lions ay hindi pa natatalo sa 17 laro habang ang Pirates ay second seeded team sa 13-4 record bago ang kanilang sagupaan sa alas-4 ng hapon.

Hangad din ng Letran Knights na patatagin ang hawak sa ikatlong puwesto sa 11-6 slate sa pakiki­pagtuos kontra sa Emilio Aguinaldo Generals sa alas-2 ng hapon.

Bukod sa Pirates wala ng ibang koponan na puwedeng humadlang sa Red Lions sa hangarin nitong walisin ang double-round elimination kung saan magiging step-ladder ang format sa playoff round.

Sa stepladder format, maghihintay ang top seed at undefeated team ng makakaharap sa best-of-three finals habang magtitipan muna ang fourth finisher at third placer sa knockout match at ang magwawagi ay lalaban sa second see­ded team bago umentra sa finals.

Kung mabibigo ang San Beda, hahantong ang playoff round sa nakasana­yang Final Four format kung saan ang top two seeds ay magkakaroon ng twice-to-beat bentahe sa paghaharap ng No. 1 kontra sa No. 4 at ng No. 3 laban sa No. 2 at ang magwawagi sa dalawang semis matches ay magtatagpo sa best-of-three finals.