20 atleta posible sa 2020 Tokyo Olympics--Ramirez
MANILA,Philippines — Kung papalarin ay posibleng umabot sa 20 ang bilang ng mga Filipino athletes na matutunghayan sa 2020 Olympic Games na gagawin sa Tokyo, Japan.
Ang pinakamaraming bilang ng atletang naisabak ng bansa sa Olympics ay 53 noong 1972 kasama rito ang national basketball team na binanderahan ni Caloy Loyzaga.
Ang silver medal naman ni light flyweight Mansueto “Onyok” Velasco Jr noong 1996 Olympics sa Atlanta, Georgia ang pinakamataas na medalyang nakamit ng bansa.
Nauna nang nag-qualify sa 2020 Tokyo Olympics sina gymnast Carlos Edriel Yulo at pole vaulter Ernest John Obiena, habang inaasahan namang susunod si weightlifter Hidilyn Diaz na bumuhat ng silver medal noong 2016 sa Rio de Janeiro, Brazil.
“If we come up with 20 qualified candidates, I think that will be one of the biggest Philippine delegations to the Olympics.” wika ni Philippine Sports Commission chairman William ‘Butch’ Ramirez. “Dapat kapag may mga batang potensyal, ibuhos na natin ‘yung suporta.”
Noong 2016 Olympics ay kabuuang 13 atleta ang nailahok ng bansa sa pamumuno nina Diaz, long jumper Marestella Torres, swimmers Jessie Lacuna at Jasmine Alkhaldi at table tennis player Ian Lariba na pumanaw sa edad na 23-anyos dahil sa sakit na acute myeloid leukemia noong Setyembre 8, 2018.
Tanging si Diaz lamang ang nakapag-uwi ng silver.
Bukod kay Diaz, umaasa rin si Ramirez na magku-qualify sa 2020 Tokyo Olympics sina boxers Nesthy Petecio at Eumir Felix Marcial, 2018 Asian Games gold medalist Margielyn Didal sa skateboarding at Fil-Japanese judoka at 2018 Asiad silver medal winner Kiyomi Watanabe.
- Latest
