Draw lots sa 7 SEAG events idaraos
MANILA, Philippines — Malalaman na ngayong araw ang schedule ng pitong events na aarangkada sa 2019 Southeast Asian Games na nakatakda sa Nobyembre 30 hanggang Disyembre 11 sa iba’t ibang panig ng bansa.
Isasagawa ngayong umaga ang drawing of lots sa Sofitel Hotel Luzon Ballroom sa Pasay City.
Kabilang sa mga kasali sa programa ang polo, football, volleyball, water polo, sepak takraw, badminton at underwater hockey.
Nakatakdang simulan ang seremonya sa alas-10 ng umaga sa pangunguna ng Southeast Asian Games Games Organizing Committee (PHISGOC) kasama ang mga opisyales ng iba’t ibang national sports associations at national Olympic committees.
Sa pagtatapos ng araw, malalaman ang mga bansang maglalaban-laban sa preliminary round gayundin ang mga bansang magkakasama sa group stage ng bawat disiplina.
Kabilang ang polo, football, (men’s at women’s), water polo, volleyball (men’s at women’s indoor, at beach volleyball) sa mga maagang magsisimula bago pa ang opening ceremonies sa Nobyembre 30.
Papalo ang polo sa Nobyembre 22 sa Batangas habang magsisimula naman ang football sa Nobyembre 25 sa Rizal Memorial Stadium (men’s division) at Los Baños Centro Mall sa Laguna (women’s division).
Idaraos naman ang indoor volleyball (men’s at women’s) sa Philsports Arena sa Nobyembre 26 at ang beach volleyball sa Subic sa Nobyembre 29.
Lalarga ang water polo sa Nobyembre 26 sa Aquatics Center sa New Clark City sa Tarlac.
Maliban sa polo, football, volleyball, water polo, sepak takraw, badminton at underwater hockey, maaga ring magsisimula ang netball sa Laguna, (Nobyembre 25), sailing sa Subic (Nobyembre 26) at windsurfing sa Subic (Nobyembre 25).
- Latest
