Eala papalo sa Finals ng JA Cape Town Jr. netfest
MANILA, Philippines — Matikas ang ratsada ni Alexandra Eala nang sumiguro ito ng tiket sa finals ng prestihiyosong 2019 JA Cape Town juniors tennis tournament na ginaganap sa Kelvin Grove tennis courts sa Rondbesoch sa Cape Town, South Africa.
Agad na nakabalikwas ang 14-anyos na si Eala sa hindi magandang laro sa second set para sorpresahin si No. 2 Matilda Mutavdzic ng Great Britain sa iskor na 6-4, 1-6, 6-3 sa semifinals ng girls’ singles.
Muling ilalabas ni Eala ang buong lakas nito dahil sasargo ito sa finals laban kay top seed Linda Fruhvirtova ng Czech Republic na umiskor ng impresibong 6-2, 6-1 panalo kay sixth pick Ziva Falkner ng Slovenia.
“It’s my first Singles Championship match in an ITF Juniors Grade A Tournament,” ani Eala na nagsanay sa Rafael Na-dal Academy sa Spain at kasalukuyang estudyante sa American International School of Mallorca.
Una nang tinalo ng fourth-seeded Pinay netter sina Christine Kruger ng South Africa sa first round (6-2, 6-2), Rufaro Magarira ng Zimbabwe sa second round (6-0, 6-1), No. 16 Tshegofatso Tsiang ng Botswana sa third round (6-0, 6-1) at fifth seed Angelina Wirges ng Germany sa quarterfinals (6-2, 6-2).
- Latest
