Flying Titans nakalipad uli
MANILA, Philippines — Kinailangan ng Choco Mucho na magbanat ng buto bago ilusot ang 32-34, 25-12, 23-25, 25-18, 15-11 panalo laban sa Chef’s Classic upang makabalik sa porma sa 2019 Premier Volleyball League Open Conference kahapon sa Malolos Sports and Convention Center sa Bulacan.
Muling nagpasabog ng kaliwa’t kanang atake si opposite hitter Kat Tolentino para buhatin ang Flying Titans sa ikatlong panalo sa siyam na pagsalang at manatiling buhay ang pag-asa nitong makahirit ng tiket sa semifinals.
Halimaw ang dating Ateneo standout na si Tolentino na kumana ng 36 puntos mula sa 28 attacks, limang aces at tatlong blocks para palakasin ang kanyang tsansang makopo ang Most Valuable Player at Best Opposite Spiker awards sa kumperensiyang ito.
Nakatulong ni Tolentino sina middle blockers Shannen Palex at Arianne Angustia gayundin sina Bang Pineda at playmaker Mary Grace Masangkay para putulin ang five-game losing skid ng Flying Titans.
Nagawang maipanalo ng Choco Mucho ang laban sa kabila ng pagkawala ni middle blocker Maddie Madayag na kasama ng national team sa 2019 Asean Grand Prix sa Nakhon Ratchasima, Thailand.
Nagbigay ng magandang laban ang Red Spikers ngunit kapos pa rin ang kanilang produksiyon para tuluyang mahulog sa 0-10 marka.
Nasayang ang paghihirap ni San Beda University outside hitter Nieza Viray na siyang nanguna sa panig ng Chef’s Classic.
- Latest