Dyip binundol ang Aces

MANILA, Philippines — Parang hindi nangga-ling si No. 1 overall pick CJ Perez sa mabigat na labanan sa nakaraang 2019 FIBA World Cup sa China.

Nagtambal sina Perez at import Khapri Alston para tulungan ang Columbian sa 117-110 paggupo sa Alaska sa pagbubukas ng 2019 PBA Governor’s Cup kahapon sa MOA Arena sa Pasay City.

Humakot ang 6-foot-3 na si Alston ng 38 points, 22 rebounds, 4 assists at 3 steals habang kumolekta si Perez ng 28 markers at 13 boards para sa unang panalo ng Dyip.

“Even though he is just 6-3, he plays like a 6-10,” sabi ni coach Johnedel Cardel sa malapad at ma-lakas na si Alston.

Naging mapait naman ang debut ni Jeffrey C­ariaso bilang bagong head coach ng Aces.

Matapos magtabla sa halftime, 56-56 ay kumamada ang Columbian sa third period para makalayo sa 78-71 bago nakumpleto ni Alston ang kanyang three-point play para sa kanilang 90-77 bentahe sa huling 47.8 segundo sa third period.

Hindi naman nawalan ng pag-asa ang Alaska at nakalapit sa 96-102 sa likod ni import Justin Watts sa huling 5:08 minuto ng fourth quarter.

Huling naghamon ang Aces sa 101-107 mula sa basket ni Abu Tratter sa nalalabing 1:25 minuto ng bakbakan.

Dalawang free throws ni Perez at isang fastbreak basket ni Glenn Khobuntin ang muling naglayo sa Dyip sa 111-104 sa natitirang 56.3 segundo para selyuhan ang kanilang panalo.

Nagdagdag si Khobuntin ng 16 points kasunod ang tig-11 markers nina Rashawn McCarthy at Juami Tiongson para sa Columbian.

Pinamunuan naman ni Watts ang Alaska mula sa kanyang game-high na 40 points.