UST pahihigpitin ang kapit sa solo 2nd
MANILA, Philippines — Target ng UST Growling Tigers ang pang-apat na panalo na kontra sa Adamson Falcons habang asam ng UP Fighting Maroons ang ikatlong panalo laban naman sa NU Bulldogs ngayon sa pagpapatuloy ng Season 82 UAAP men’s basketball tournament sa Mall of Asia Arena sa Pasay City.
Kailangan ng Growling Tigers na magwagi laban sa Soaring Falcons sa kanilang pagtatagpo sa alas-12:30 ng hapon upang manatili sa ikalawang puwesto sa likuran ng nangungunang two-peat champion Ateneo Blue Eagles, ang tanging koponan na hindi pa nakatikim ng talo sa apat na laro (4-0).
Hangad naman ng Fighting Maroons ang back-to-back win at third overall sa pakikipagtuos kontra sa nangungulelat na Bulldogs (0-3) sa alas-10:30 ng umaga habang maghihiwalay naman ang FEU Tamaraws (1-2) at De La Salle Green Archers (1-2) sa sosyohan sa ika-limang puwesto sa kanilang engkuwentro sa alas-4 ng hapon.
Galing ang España-based Tigers sa 87-74 overtime win kontra sa Bulldogs noong Linggo kung saan kumonekta si Rhenz Abando ng dalawang triples sa extension period upang pangunahan ang ikatlong panalo sa apat na laro ng tropa ni coach Aldin Ayo.
- Latest
