Semis tiket ibubulsa ng Saints at Engineers
MANILA, Philippines — Target ng BRT Sumisip Basilan-St. Clare College at Technological Institute of the Philippines na maibulsa ang huling dalawang silya sa semifinals sa pagsagupa sa magkaibang karibal sa 2019 PBA D-League Foundation Cup sa Paco Arena sa Manila.
Makakatipan ng Saints ang Hyperwash ngayong ala-1:30, habang aariba naman ang Engineers sa Black Mamba sa alas-3:30.
Armado ang BRT Sumisip Basilan-St. Clare at TIP ng ‘twice-to-beat’ advantage matapos manguna sa Group B.
Winalis ng Saints ang anim na laro sa eliminasyon para makopo ang No. 1 seat.
Kabilang sa mga nabiktima ng BRT Sumisip-St. Clare ang Hyperwash sa pamamagitan ng 129-72 demolisyon.
Ngunit ibang usapan na ang semis.
Kaya naman inatasan ni Saints head coach Stevenson Tiu ang kanyang mga bataan na ibuhos na ang lahat upang makaiwas sa mas kumplikadong sitwasyon.
“It will be a different story come the quarterfinals and the semifinals. All of our lopsided wins will not be carried over. So, we have to start from scratch again,” wika ni Tiu.
Aasahan ni Tiu sina Malian big man Mohammed Pare, captain Junjie Hallare at guard Joshua Fontanilla kasama sina Alfren Batino at Hesed Gabo katapat sina ex-pros JR Cawaling, Khazim Mirza at Jeric Fortuna ng Vipers.
Ang mananalo sa pagitan ng Saints at Vipers ang haharap sa Centro Escolar University sa best-of-three semifinals.
Sa kabilang banda, isang buwan na napahinga ang TIP at umaasa si Engineers mentor Potit De Vera na hindi kinalawang ang kanyang tropa laban sa Black Mamba.
- Latest
