Cariaso igigiya ang Aces kontra sa Dyip
MANILA, Philippines — Ipaparada ng Alaska sina head coach Jeffrey Cariaso at import Justin Watts laban sa Columbian sa pagdribol ng 2019 PBA Governor’s Cup sa Biyernes sa Mall of Asia Arena sa Pasay City.
Magtutuos ang Aces at Dyip sa alas-4:30 ng hapon kasunod ang upakan ng Rain or Shine Elasto Painters at NorthPort Batang Pier sa alas-7 ng gabi.
Ang 47-anyos na si Cariaso ang ipinalit ng Alaska kay Alex Compton sa season break.
Ito ang ikalawang pagkakataon na hahawak si Cariaso ng koponan bilang coach matapos pamunuan ang Barangay Ginebra noong 2014 season.
Makakatapat naman ni Watts sa panig ng Columbian si Khapri Alston.
Sa ikalawang laro ay itatampok ng Batang Pier si dating TNT Katropang Texters reinforcement Mychal Ammons kontra kay Joel Wright, dating naglaro para sa Purefoods franchise, ng Elasto Painters.
Ang Star Hotshots ang magdedepensa sa korona ng torneo.
Sa Sabado ay maghaharap ang NLEX at Phoenix sa alas-4:30 ng hapon kasunod ang bakbakan ng Star at Meralco sa alas-6:30 ng gabi sa Smart Araneta Coliseum.
Mulingt tinapik ng Road Warriors si Olu Ashaolu kagaya ni Eugene Phelps ng Fuel Masters.
Si one-time PBA Best Import Allen Durham ang aasahan pa rin ng Bolts katapat si Romeo Travis ng Hotshots.
- Latest