Saludar nahubaran ng titulo

MANILA, Philippines — Bigong maipagtanggol ni Vic Saludar ang korona matapos umani ng unanimous decision loss kay Puerto Rican Wilfredo Mendez para ipaubaya ang kanyang World Boxing Organization (WBO) minimumweight world belt kahapon sa Puerto Rico Convention Center sa San Juan, Puerto Rico.

Pumanig ang tatlong hurado sa Puerto Rican fighter sa iskor na 117-110, 115-112 at 116-111.

Matikas ang ipinamalas ni Saludar kung saan nagawa pa nitong mapatumba si Mendez sa second round.

Subalit hindi ito sapat para makuha ang panalo.

Maluwag na tinanggap naman ni Saludar ang kabiguan.

“Okay lang ang laban ko kahit talo ako at least ginawa ko lahat ng aking makakaya, kahit dito pa sa kanila,” anang 28-anyos na tubong Polomolok, South Cotabato.

Nahulog sa 19-4 tampok ang 10 knockouts ang rekord ni Saludar habang umangat sa 14-1 ang marka ni Mendez.