Overeating

Muntik-muntikan na naman si Johnriel Casimero, ang tingin ko tuloy ay hindi na niya kaya ang timbang na bantamweight.

Lampas na naman sa weight limit na 118 pounds si Casimero bago niya nilabanan si Cesar Ramirez ng Mexico nung Sabado ng gabi sa San Andres Sports Complex.

Maliit lang naman ang over niya. Wala pang one pound.

Pero nahirapan pa rin siya. Kinailangan pa niyang bumalik sa hotel para mag-hot shower. Tapos ay binalot siya ng mga kumot at ginupitan ng buhok Matapos ang dalawang oras, nakuha niya ang timbang. Pero piniga.

Natuloy ang laban at nanalo si Casimero. Knockout sa 10th round ang kalaban.

Masaya naman ako at nakalusot siya. Hindi gaya nung 2014 nung mawala ang IBF light-flyweight world title niya dahil five pounds overweight siya. Nasa 112 pounds pa lang siya na division noon.

Ngayon sa 118 eh hirap pa rin si Casimero.

Inilalatag ang WBO bantamweight title match niya laban kay Zolani Tete ng South Africa bago matapos ang taon. Sa United States daw ito gaganapin.

Hinahangad ni Casimero maging world champion ulit.

Pero dapat niyang pag-ingatan ang timbang niya. Nung June kasi nang huli natin siyang makita, nasa 147 pounds daw siya. Eh sobrang bigat.

“Ang sarap kasi kumain,” sabi ni Casimero.

Hinay-hinay lang. Dahil kung hindi, tyak na pipigain na naman siya makuha lang ang timbang sa sunod niyang laban.

Layo muna sa kusina.