Scorpions pinulutan ang Chargers para sa playoff seat

MANILA, Philippines — Pinulbos ng Centro Es­colar University ang iWalk, 120-84, para masikwat ang silya sa playoffs sa pagpapatuloy ng 2019 PBA D-League Foundation Cup kahapon sa JCSGO Gym sa Cubao, Quezon Ci­ty.

Humakot si Sene­ga­lese big man Malick Diouf ng 29 points, 21 rebounds, 8 assists, 5 blocks at 2 steals upang banderahan ang Scorpions sa pagkopo ng ikaapat na sunod na pa­nalo sa torneo.

Bumida rin si Rich Gui­nitaran na kumana ng 21 mar­kers, habang nagdag­dag sina Kyle Sunga at Eric Tuadles ng 17 at 12 mar­kers, ayon sa pagkaka­sunod, para mapatatag ng CEU ang kapit sa solong pamumuno sa Group A hawak ang 4-0 baraha.

Maagang inilatag ng CEU ang kanilang bangis ma­tapos pamunuan nina Tuadles at Joshua Abastillas ang 9-0 panimula tungo sa 42-24 bentahe sa se­cond quarter,

Napalobo ito ng Scor­pions sa 39 puntos, 116-77, sa hu­ling dalawang mi­nuto ng laro.

Tumipa si Bernie Bre­gondo ng 19 points at 12 re­bounds at naglista si Wowie Escosio ng 14 markers at 6 rebounds para sa Chargers (2-2).