Aces sinibak ang Bolts sa playoff; lalabanan ang Texters sa quarters
MANILA, Philippines — Ang Alaska ang hahamon sa top seed TNT Katropa sa quarterfinals.
Naisuko man ang itinayong 13-point lead sa third period ay tinalo pa rin ng Aces ang Meralco Bolts sa overtime, 108-103, sa kanilang playoff para sa No. 8 seat sa quarterfinals ng 2019 PBA Commissioner’s Cup kagabi sa MOA Arena sa Pasay City.
Kinuha ng Alaska ang 56-43 abante bago nakahabol ang Meralco at napunta ang laro sa extra period.
Bilang No. 8 ay lalabanan ng Aces ang No. 1 Katropang Texters, may bitbit na ‘twice-to-beat’ advantage sa quarterfinals.
Samantala, lalabanan ng No. 4 Barangay Ginebra ang No. 5 Magnolia ngayong alas-6:45 ng gabi sa Game One ng kanilang best-of-three quarterfinals series sa MOA Arena.
Sa unang laro sa alas-4:30 ng hapon ay sisimulan din ng No. 3 Blackwater at No. 6 Rain or Shine ang kanilang sariling quarterfinals duel.
Nauna nang binigo ng Ginebra, ang nagdedepensa sa korona, ang Magnolia, 102-81, sa eliminasyon.
“It doesn’t take a lot of motivation to get ready for a Manila Clasico. And obviously, it’s the playoffs so it’s times two,” sabi ni two-time PBA Grand Slam champion coach Tim Cone sa pagsagupa ng kanyang Gin Kings sa Hotshots.
Nasa three-game winning run ang Ginebra, habang nahulog ang Magnolia sa apat na sunod na kamalasan ang huli ay sa 83-98 pagyukod sa TNT Katropa na nagtampok sa debut game ni dating NBA player Rakeem Christmas.
- Latest