Cargo movers hinataw ang ika-8 panalo
MANILA, Philippines — Hindi maawat ang F2 Logistics nang ilampaso ang Sta. Lucia Realty, 25-22, 25-3, 25-12, para manatiling malinis ang kanilang rekord sa 2019 Philippine Superliga All-Filipino Conference kahapon sa The Arena sa San Juan City.
Nagpakawala si Fi-Am Kalei Mau ng 13 points tampok ang 12 attacks at 15 digs, habang kumana naman si dating MVP Ara Galang ng 11 markers mula sa siyam na attacks at dalawang blocks kasama pa ang 15 digs para pamunuan ang Cargo Movers sa pagkopo ng ikawalong sunod na panalo.
“We just got to make sure that we start strong. Once we get the rhythm, once we get the momentum I think we’re pretty hard to crack so that’s one thing that we’re gonna focus on in the next few games,” sabi ni Mau.
Nag-ambag si Majoy Baron ng siyam na puntos kabilang ang limang blocks, habang nakalikom si libero Dawn Macandili ng 24 digs at pitong receptions para sa F2 Logistics.
Nagbaon ng 43 attacks ang Cargo Movers laban sa 26 lamang ng Lady Realtors.
Nakakuha pa ang F2 Logistics ng 9-3 edge sa blocks at 8-4 bentahe sa service area.
May 15 libreng puntos pa ang Cargo Movers mula sa errors ng Lady Realtors.
Gayunpaman ay hindi kuntento si Galang sa mabagal na simula ng kanilang tropa kung saan nabaon ang Cargo Movers sa 10-19 sa first set.
Masuwerte at mabilis na nakabalik sa porma ang Cargo Movers sa likod nina Galang, Mau at Aby Maraño na siyang nanguna sa 12-2 run ng tropa upang makuha ang panalo.
Lumasap naman ang Sta. Lucia ng ikawalong sunod na kabiguan tangan ang 1-8 marka.
- Latest
