Timeout
Nagpaalam si Jayson Castro kay coach Yeng Guiao na pass muna siya sa Gilas team na lalaro sa darating na FIBA World Cup sa China.
Nagpaalam na din daw si Jayson sa grupo ni MVP na sumusuporta at nagpopondo sa Gilas Pilipinas.
Naiintindihan naman nila lahat si Jayson.
Ako din. Sana kayo din.
Bagong kasal si Jayson. At gusto niya tuunan naman ng panahon ang kanyang pamilya.
May dalawa na silang anak pero dahil nga daw sa sobrang busy niya sa TNT Katropa sa PBA at sa Gilas ay hindi nila maplano ang wedding.
“Pitong taon,” sabi ni Jayson.
Nakakapagod nga din naman na sa huling pitong taon eh, basketball na lang ang ikot ng mundo niya.
Kung break sa PBA, may Gilas naman.
Araw-araw na laro at ensayo. Kahit sino nga naman eh, mapapagod.
Iyong iba nga, nagpapaalam din. Madalas na palusot eh, injured.
Bigyan naman natin ng panahon si Jayson na dating naturingan na best pointguard sa Asia para sa pamilya niya.
Natanong din pala siya kung retirement na sa Gilas ang gusto niyang ipahiwatig.
“Siguro,” sabi ng 32-year-old na player.
Huwag naman sana Jayson.
- Latest