Unang panalo para sa Blaze Spikers
Laro Bukas(Imus Sports Center)
4 p.m. Sta. Lucia vs PLDT
6 p.m. F2 vs Foton
MANILA, Philippines — Kaagad umariba ang nagdedepensang Petron matapos gulpihin ang bagitong Marinerang Pilipina via straight set, 25-21, 25-16, 25-10, para makuha ang unang panalo sa 2019 Philippine Superliga All-Filipino Conference kahapon sa Imus Sports Center sa Cavite.
Mainit ang simula ng Blaze Spikers na humataw nang husto sa attack line sa pangunguna ni middle hitter Mika Reyes na kumamada ng limang attacks, tatlong blocks at dalawang aces para banderahan ang kanilang tropa sa 1-0 panimula.
“Nag-enjoy lang kami sa laro dahil kailangan masaya lang kami inside the court whether nagkamali ka o hindi. Dapat smile lang dahil nakaka-lift ‘yun ng spirits ng teammates,” ani Reyes na magdiriwang ng ika-25 kaarawan ngayong araw.
Umiskor din ng malaking puntos sa attack line sina UAAP Season 81 MVP Sisi Rondina, Bernadeth Pons at Ces Molina, habang maganda ang koneksyon nina playmaker Rhea Dimaculangan at libero Ria Duremdes para makuha ang panalo.
Rumatsada ang Blaze Spikers ng umaatikabong 42 attacks laban sa 21 lamang ng Lady Skippers.
Nagrehistro rin ang Petron ng pitong puntos sa blocking department.
Pinarusahan din ng Blaze Spikers ang reception ng Marinerang Pilipina nang nagpakawala ito ng walong aces sa larong tumagal lamang ng isang oras at 12 minuto.
Tila nangangapa pa ang Blaze Spikers sa umpisa ng laro dahilan upang makagawa ito ng karamihan sa 18 total errors ng tropa.
Ngunit mabilis na nakuha ng Petron ang perpektong kundisyon para paliguan ang Marinerang Pilipina ng matatalim na atake sa mga sumunod na sets para tuluyang makuha ang panalo.
Patuloy na inaalat ang Lady Skippers na lumasap ng ikatong dikit na kabiguan.
- Latest