Thurman ‘di uubra kay Pacquiao--Khan
MANILA, Philippines — Kung si dating World Boxing Association (WBA) super at International Boxing Federation (IBF) light-welterweight champion Amir Khan ang tatanungin, hindi makakaporma si undefeated American boxer Keith Thurman kay eight-division world champion Manny Pacquiao sa oras na magkrus ang kanilang landas sa Hulyo 20 sa Las Vegas, Nevada.
Dalawang taong nagpahinga si Thurman.
At sa pagbabalik-aksiyon ni Thurman noong Enero, hindi bilib si Khan sa ipinakita nito laban kay Josesito Lopez sa Barclays Center sa New York.
“I think Manny Pacquiao vs Keith Thurman is a good fight. For me, I just don’t feel Keith Thurman has got it in him anymore,” pahayag ni Khan sa panayam ng World Boxing News.
Hindi aniya nagawang dominahin ni Thurman si Lopez dahilan para mauwi ito sa unanimous decision at mapanatili ang WBA super welterweight title.
Malayo ang porma ni Thurman kumpara kay Pacquiao.
Bagamat nagtala rin ng unanimous decision win nang ipagtanggol ang kanyang WBA regular welterweight belt, kitang-kita ang pagbabalik ng bagsik ni Pacquiao nang gulpihin nito si Adrien Broner.
“What would Manny Pacquiao have done to Josesito Lopez? I just think Keith doesn’t have it in him. I’m not sure what lifestyle he lives outside of the ring or whether being out of the ring so long has affected him,” ani Khan.
Kabisado ni Khan ang lakas ng kamao ni Pacquiao dahil ilang beses na itong nagkasama sa sparring sessions sa ilalim ni American trainer Freddie Roach.
At alam ni Khan ang kakayahan ni Pacquiao partikular na ang pamatay nitong knockout punch.
Tinukoy ni Khan ang bilis at lakas ng kamao na magiging pangunahing armas ni Pacquiao laban kay Thurman.
- Latest
