Parks excited harapin ang Ginebra
MANILA, Philippines — Kaagad pinatunayan ni Bobby Ray Parks Jr. kung bakit siya dapat hiranging bilang No. 2 overall pick sa nakaraang PBA Rookie Draft.
Sa kanyang debut game ay nagtala ang 6-foot-4 na si Parks ng 20 points, 8 rebounds, 3 steals at 2 assists para sa 94-91 overtime victory ng Blackwater laban sa Meralco sa pagbubukas ng 2019 PBA Commissioner’s Cup noong Linggo.
Ayon sa anak ni seven-time PBA Best Import Bobby Parks, kasalukuyan pa siyang nag-a-adjust sa laro sa PBA.
“That’s the most important thing. Rough shooting night, I’m still adjusting,” wika ni Parks. “At the end of the day, we got the win.”
Hindi kaagad naisuot ng 26-anyos na si Parks ang uniporme ng Elite sa nakaraang 2019 PBA Philippine Cup, pinagharian ng San Miguel Beermen sa pang-limang sunod na pagkakataon, dahil sa kanyang kontrata sa Alab Pilipinas sa Asean Basketball League.
Sa kanyang paglalaro sa Blackwater ay isang one-year contract lamang ang pinirmahan ng three-time ABL Local MVP awardee.
“We are still hungry for more wins and we have to get better in order to beat the tougher teams,” wika ni Parks sa Elite.
Susunod na lalabanan ng Blackwater ni coach Aries Dimaunahan ang nagdedepensang Barangay Ginebra sa Biyernes.
“They have a lot of great players, height, diversity, well-coached. It’s going to be a great challenge,” sabi ng two-time UAAP MVP sa Gin Kings na muling babanderahan ni PBA Best Import Justin Brownlee.
- Latest
