Ramirez gold sa World Pro Jiu-Jitsu meet
MANILA, Philippines — Nasungkit ni Annie Ramirez ang gintong medalya sa prestihiyosong 2019 World Professional Jiu-Jitsu Championship na ginanap sa Mubadala Arena sa Abu Dhabi, United Arab Emirates.
Inilatag ni Ramirez ang malakas na puwersa upang igupo si Sophia Dalpra Atos ng Amerika sa bisa ng 28-6 desisyon sa finals para makuha ang unang puwesto sa women’s purple 55 kg. division.
Umusad sa gold-medal match si Ramirez matapos igupo si Maha Alhinaai ng host United Arab Emirates sa iskor na 29-2 sa semifinals ng torneong nilahukan ng mahigit 100 fighters mula sa iba’t ibang panig ng mundo.
Nakasiguro ng opening-round bye si Ramirez bago igupo si Galina Duvanova ng Kazakhstan sa bendisyon ng 26-2 pananaig sa quarterfinal round.
Naibulsa naman ni Letici Murakami ng Brazil ang tansong medalya nang payukuin nito si Alhinaai sa bronze-medal match, 30-2.
Hindi pinalad na makaabot sa medal round sina Mary Angelie Sanchez at Maria Alexis Bacerdo na natalo sa second round sa women’s blue 49 kg. class.
Yumuko si Sanchez kay Benyatip Phumthong ng Thailand (5-36) habang tumupi si Bacerdo kay Boonsorn Suwanan ng Thailand (5-40).
- Latest