Cignal-Ateneo swak sa playoffs
Laro sa Lunes(JCSGO Gym, Cubao)
1 p.m. McDavid vs
Ironcon-UST
3 p.m. Che’Lu Bar and Grill vs Cignal-Ateneo
MANILA, Philippines — Inilampaso ng Cignal-Ateneo de Manila University ang Batangas-Emilio Aguinaldo College, 90-46 upang masungkit ang playoff berth sa 2019 PBA D-League kahapon sa Ynares Sports Arena sa Pasig City.
Umiskor si Matt Nieto ng 10 sa kanyang 16 puntos sa first half kasama ang dalawang rebounds at dalawang assists habang kumana naman si Tyler Tio ng 19 markers para pamunuan ang Blue Eagles sa paglista ng 7-1 baraha.
Malakas din ang suporta ni William Navarro na may double-double na 13 points, 11 rebounds at dalawang blocks gayundin sina Mike Nieto at Isaac Go na may pinagsamang 21 puntos.
“It was a physical game and I think that’s certainly their formula with dealing with our big guys. But I told the players to play through that and play good basketball, and that’s what we focused on,” ani Blue Eagles head coach Tab Baldwin.
Bagsak ang Generals sa 2-6 kartada.
Namayani naman ang Valencia City Bukidnon-San Sebastian College Recoletos sa University of Perpetual Help System Dalta, 106-75 upang makalapit sa playoff berth.
Bida si RK Ilagan na kumana ng 27 puntos tampok ang apat na three-pointers kalakip ang pitong rebounds, pitong assists at dalawang steals para buhatin ang Valencia-SSCR sa ikalawang puwesto tangan ang 5-1 baraha sa Foundation Group.
- Latest
