CEU pakay ang playoffs

MANILA, Philippines — Target ng Centro Escolar University na masungkit ang unang tiket sa playoffs sa pagsagupa nito sa SMDC-National University sa pagpapatuloy ng 2019 PBA D-League ngayong araw sa Ynares Sports Arena sa Pasig City.

Makakasagupa ng Scorpions ang Bulldogs sa alas-3 ng hapon matapos ang engkuwentro ng University of Perpetual Help System Dalta at Valencia City Bukidnon-San Sebastian College Recoletos sa alas-11 ng umaga at ng Cignal-Ateneo de Manila University at Batangas-Emilio Aguinaldo College sa ala-una.

Tanging ang apat na mangungunang koponan sa Aspirants Group at Foundation Group matapos ang single round-robin elimination ang uusad sa playoffs. Ang Top 2 teams sa dalawang grupo ay mabibiyayaan ng twice-to-beat advantage.

Hawak ng CEU ang solong pamumuno sa Foundation Group bitbit ang imakuladang 6-0 rekord kung saan isang panalo na lamang ang kailangan nito para masikwat ang una sa apat na silya sa playoffs sa kanilang grupo.

Nasa ikalawa ang Metropac (5-1) kasunod ang Valencia (4-1) at Chadao-FEU (4-3).