Bucks kakasa sa Celtics
DETROIT — Nagpasabog si Giannis Antetokounmpo ng 41 points para banderahan ang Milwaukee Bucks sa 127-104 pagsibak sa Pistons sa Game Four at kumpletuhin ang four-game sweep patungo sa second round ng playoffs.
Ito ang unang pagmartsa ng Bucks sa second round matapos noong 2001.
Isinara ng Milwaukee ang third quarter sa pamamagitan ng 17-3 atake para itayo ang 10-point lead papunta sa fourth period matapos manguna ang Detroit.
Nagtala ang Pistons ng NBA record na ika-14 sunod na playoff loss na nagsimula noong 2008.
Lalabanan ng Bucks ang Boston Celtics sa second round. Winalis din ng Celtics ang Indiana Pacers, 4-0 sa first round.
Umiskor si Reggie Jackson ng 26 points sa panig ng Detroit, nakakuha ng 22 markers kay Blake Griffin na na-foul out sa 7:06 minuto ng laro.
Sa Salt Lake City, humugot si Donovan Mitchell ng 19 sa kanyang 31 points sa fourth quarter para akayin ang Utah Jazz sa 107-91 paggupo sa Houston Rockets sa Game Four ng kanilang Western Conference first-round series.
Nag-ambag si Jae Crowder ng 23 points habang naglista si Ricky Rubio ng 18 points at 11 assists para ilapit ang Jazz sa Rockets sa 1-3 sa kanilang serye.
- Latest