Biado bigo kay Cheng sa finals ng World Pool
MANILA, Philippines — Lumasap si 2017 World 9-Ball titlist Carlo Biado ng dikitang 11-12 kabiguan sa mga kamay ni Kevin Cheng ng Chinese-Taipei sa finals upang magkasya sa runner-up trophy ng 2019 World Pool-Billiard Association (WPA) Players Championship na ginanap sa Griffs Billiards sa Las Vegas, Nevada.
Napasakamay ni Cheng ang tumataginting na $10,000 papremyo, habang hindi naman uuwing luhaan si Biado na nagkamit ng $7,000 bilang konsolasyon.
May tsansa sana si Biado na masikwat ang kampeonato nang magtala siya ng 8-5 kalamangan.
Ngunit nagmintis ang Pinoy cue master sa No. 4 ball, bagay na sinamantala ng Taiwanese para makabalik sa porma at mahablot ang panalo.
Umabante sa finals si Biado nang magtala ng 9-6 panalo laban kay Chang Yu-ung ng Chinese-Taipei sa semifinal round.
Naharang naman ni Cheng ang tangkang all-Filipino finale matapos igupo si Pinoy cue artist Johan Chua, 9-6, sa hiwalay na semis match.
Kabilang sa mga pinataob ni Biado ay sina Ruben Bautista Escaler sa first round, 7-3, Skyler Woodward sa second round, 7-5, Yang Ching-Shun ng Chinese-Taipei sa third round, 7-6, at Shane Van Boening sa quarterfinals, 7-4.
Nagtapos sa ikatlo si Chua para sa $5,000 konsolasyon, habang magkasosyo sa ika-siyam sina Raymund Faraon at James Aranas na kapwa nagkamit ng $1,500 matapos makaabot sa third round.
Tinalo ni Faraon sina Robbie Capito sa first round, 7-5, at Corey Deuel sa second round, 7-3, ngunit yumuko siya kay Ralf Souquet sa third round, 0-7, habang namayani naman si Aranas kina Justin Bergman sa first round, 7-0, Naoyuki Oi sa second round, 7-5, bago natalo kay Chang Yu Lung sa third round, 6-8.
- Latest
