Antetokoumpo gumana, Bucks No. 1 sa East
PHILADELPHIA-- Tumirada ng 45 puntos at 13 rebounds si Giannis Antetokoumpo upang iangat ang Milwaukee Bucks sa 128-122 panalo kontra sa 76ers para makamit ang best record sa Eastern Conference.
Tumapos din ng 22 puntos si Khris Middleton para sa Bucks na papasok sa playoff bilang No. 1 seed sa Eastern Conference sa unang pagkakataon sa franchise history. Naging top seed din sila sa Western Conference ng tatlong beses sa una nilang anim na taon sa NBA, ang huli ay noong 1973-74 season.
Nagtala rin si Joel Embiid ng kanyang ikalawang career triple-double na 34 puntos, 13 rebounds at 13 assists sa kanyang pagbabalik makaraang mawala ng tatlong games dahil sa left knee injury.
Sa Los Angeles, umiskor si DeMarcus Cousins ng walong puntos sa kanyang kabuuang 21 sa unang pitong minuto para sa 108-90 panalo ng bisitang Golden State Warriors laban sa Lakers.
Dahil sa panalo (54-24), mahigit dalawang panalo na lamang ang kailangan ng nagdedepensang Warriors upang tuluyan ng angkinin ang top seed sa Western Conference.
Sa Sacramento, umiskor ng game-high 23 puntos si Buddy Hield para sa 117-104 panalo ng Kings laban sa Cleveland Cavaliers.
Pinangunahan ng Fil-Am Jordan Clarkson ang Cavaliers sa kanyang 22 puntos sa 9-of-13 shooting sa field.
Natamo ng Cavs (19-60) ang kanilang ika-pitong sunod na kabiguan dahilan para bumagsak sa 6-34 sa road game kung saan natalo ito ng 60 laro o higit pa sa ika-limang pagkakataon sa franchise history.
- Latest