Ginebra tangka ang No. 3 vs Meralco
Laro Ngayon(Smart Araneta Coliseum)
4:30 p.m. Alaska vs NorthPort
7 p.m. Ginebra vs Meralco
MANILA, Philippines — Dahil sa tuluyang pag-angkin ng Rain or Shine sa No. 2 seat ay tanging hahangarin na lamang ng Barangay Ginebra ay ang masikwat ang No. 3 spot sa eight-team quarterfinal round.
Lalabanan ng Gin Kings ang Meralco Bolts ngayong alas-7 ng gabi matapos ang pagtutuos ng Alaska Aces at NorthPort Batang Pier sa alas-4:30 ng hapon sa 2019 PBA Philippine Cup sa Smart Araneta Coliseum.
Nagmula ang Gin Kings (6-3) sa 105-96 panalo laban sa NLEX Road Warriors (4-6) na nagpormalisa sa kanilang pagpasok sa quarterfinals habang nakalasap ng 77-92 pagyukod ang Bolts (3-7) laban sa Aces (4-5).
Kahit na magtapos sa magkaparehong baraha ang Ginebra at Rain or Shine (8-3) ay makakamit pa rin ng Elasto Painters ang No. 2 seat bunga ng kanilang 83-80 panalo laban sa Gin Kings sa una nilang pagtatagpo.
Ang No. 1 Phoenix (9-2) at No. 2 Rain or Shine ang magbibitbit ng ‘twice-to-beat’ advantage laban sa No. 8 at No. 7 teams, ayon sa pagkakasunod, sa quarterfinals.
Maglalaban naman sa isang best-of-three series ang No. 3 at No. 6 at ang No. 4 kontra sa No. 5 squad.
Sa unang laro, puntirya naman ng NorthPort (3-6) ang kanilang ikalawang sunod na panalo sa pagharap sa Alaska para buhayin ang tsansa sa quarterfinals.
- Latest