Lady Spikers, Tigresses kakalas sa 4-way tie

Laro Ngayon(FilOil Flying V Center)

8 a.m. UE vs NU (M)

10 a.m. ADMU vs DLSU (M)

2 p.m. UST vs ADU  (W)

4 p.m. NU vs DLSU (W)

MANILA, Philippines — Kapwa hangad ng three-straight champion De La Salle Lady Spikers at University of Santo Tomas Tigresses na bumangon agad mula sa masaklap na kabiguan sa kanilang mag­kahiwalay na laban ngayon sa pagpapatuloy ng Season 81 UAAP Volleyball tournament sa FilOil Flying V Center sa San Juan City.

Galing ang Lady Spi­kers sa kanilang ikalawang talo sa mga kamay ng UP Lady Maroons, 16-25, 24-26, 25-19  sa se­cond round ng elims noong Linggo habang asam ng UST Tigresses na bumawi sa mapait na  25-19, 25-22, 25-27, 22-25, 11-15 pag­yuko sa Ateneo Lady Eagles noong Marso 20.

Dahil sa kabiguang ito, kapwa nais ng  Lady Spi­kers at Tigresses na buma­wi agad upang makawala sa four-way tie sa ikalawang puwesto kasama ang FEU Tamaraws at UP Lady Maroons sa parehong 5-3 win-loss kartada sa likuran ng solo leader Ateneo Lady Eagles na may 7-1 slate.

Haharapin ng Lady Spi­kers ang National University Lady Bulldogs (2-6) sa alas-4 ng hapon pagkatapos ng pagtatagpo ng Tigresses (5-3) at Adamson Lady Falcons (1-7) sa alas-2 ng hapon.

Sinisisi ni multi-titled coach Ramil de Jesus ang kanilang 17 service errors na siyang dahilan sa kanilang three-set loss sa Lady Maroons, lima nito mula kay Lourdes Cle­mente at tig-tatlo sina Aduke Ogunsanya, Marionne Alba at Jolina De La Cruz.

Sa men’s division, asam ng NU Bulldogs (7-1) na muling angkinin ang solo liderato sa pakiki­pagtuos kontra sa UE Red Warriors (2-6) sa alas-8 ng umaga habang target naman ng Ateneo Blue Eagles (5-3) ang pang-anim na panalo laban sa DLSU Green Spikers (3-5) sa alas-10 ng umaga.