Harden nagpasabog ng 61-pts.

HOUSTON--Dinuplika ni James Harden ang kanyang career high na 61 points, kasama ang 27 sa first quarter para banderahan ang Rockets sa 111-105 panalo kontra sa bisitang San Antonio Spurs.

Nagsalpak si Harden ng tatlong sunod na 3-pointers para ibigay ang 103-100 kalamangan sa Houston at iniskor ang lahat ng puntos sa inihulog na  13-2 bomba sa dulo ng fourth quarter.

Ito ang pang-walong pagkakataon na humataw si Harden ng higit sa 50-point mark ngayong season.

Nalampasan ng NBA leading scorer ang 30-point mark sa second quarter at ang 40-point mark sa siyam na minuto sa third period.

Sa New York, nagsumite si Nikola Jokic ng 21 points at 17 rebounds at nag-ambag si Jamal Murray ng 18 points para sa 111-93 panalo ng Denver Nuggets kontra sa Knicks.

Ito ang ikaanim na dikit na ratsada ng Denver, nakahugot kay Gary Harris ng 14 points para tumabla sa defending champion Golden State Warriors sa first place sa Western Conference.

Sa Toronto, kumamada si Paul George ng 28 points, habang nagtala si Russell Westbrook ng triple-double mula sa kanyang 18 points, 13 assists at 12 rebounds para ihatid ang Oklahoma City Thunder sa 116-109 pagdaig sa Raptors.

Tumipa ang Thunder ng 20-of-43 shooting sa 3-point range.

 Sa Orlando, umiskor si Terrence Ross ng 31 points at nag-ambag si Evan Fournier ng 27 mar­kers kasama ang game-clinching free throws para tulungan ang Magic sa 123-119 overtime win laban sa Memphis Grizzlies.