Warriors umeskapo sa Kings

OAKLAND, Calif —  Nag­hulog si guard Stephen Curry ng 10 three-point shots habang nagposte si Kevin Durant ng 28 points, 9 rebounds at pinantayan ang kanyang career-high na 7 blocks para sa 125-123 paglusot ng Golden State Warriors kontra sa bisitang Sacramento Kings.

Tumapos si Curry na may 36 points para sa Warriors, nakahugot kay DeMarcus Cousins ng 17 points at 10 rebounds laban sa dati niyang tropa.

Mula sa 123-117 abante ng Golden State sa huling 25.5 segundo sa fourth quarter ay nakadikit ang Sacramento sa 123-125 mula sa back-to-back triples ni Buddy Hield.

Matapos ang mintis na dalawang free throws ni  Andre Iguodala para sa Warriors ay kapos naman ang tangkang tres ni Hield sa huling posesyon ng Kings.

Ito ang ikaapat na sunod na panalo ng Golden State laban sa Sacramento ngayong season.

Sa Philadelphia, humugot si Tobias Harris ng 12 sa kanyang 23 points sa third quarter  habang nagsalpak si JJ Redick ng mahalagang tres para ihatid ang 76ers sa 106-102 pananaig kontra sa Miami Heat.

Naglaro ang Philadelphia na wala si All-Star center Joel Embiid, may injury sa kaliwang tuhod.

Sa Los Angeles, kumamada si LeBron James ng 29 points at nagdagdag si Brandon Ingram ng 27 markers para pamunuan ang Lakers sa 111-106 pagdaig sa Houston Rockets.

Sa Milwaukee, umiskor si Giannis Antetokounmpo ng 12 sa kanyang 30 points sa fourth quarter at nagsalpak si Khris Middleton ng isang 3-pointer sa dulo ng laro para ihatid ang NBA-leading Bucks sa 98-97 pagtakas laban sa Boston Celtics.