Go For Gold riders determinadong makapasok sa 2020 Tokyo Olympics
MANILA, Philippines — Matapos ang magandang kampanya sa katatapos na 2019 Ronda Pilipinas ay mas mabibigat pang karera ang sasabakan ng Go For Gold Philippines Continental Team sa hangaring makapaglahok ng isang Pinoy rider sa 2020 Olympic Games sa Tokyo, Japan.
Kakarera ang Team Go For Gold sa five-stage Tour de Iskandar sa Johor, Malaysia sa Abril na isa ring Union Cycliste Internationale (UCI) race na nag-aalok ng puntos para sa mga Pinoy cyclists na naghahangad makasali sa global Summer Games.
“We have to race in as many UCI races as we can to realize our dream of seeing a Filipino participate in the cycling competitions of the Olympics,’’ ani Go For Gold godfather Jeremy Go.
Lalahok din ang koponan sa mga karera sa Singapore, Indonesia, Thailand at Sri Lanka bukod pa sa Le Tour de Filipinas at national championships sa Hunyo kung saan maglalatag din ng UCI points.
Hinirang si Ismael Grospe bilang best young rider matapos pamunuan ang under-23 category ng Ronda na sinalihan ng 15 tropa, ang walo rito ay mga banyagang koponan.
Bukod kay Grospe, kumampanya rin para sa Go For Gold sina Jonel Carcueva, Elmer Navarro, Boots Ryan Cayubit at Daniel Ven Carino at tumapos sa fourth overall sa team race ng nasabing five-day event.
Tumapos din ang Go For Gold sa third overall sa hanay ng mga Filipino teams sa likod ng 7/Eleven Road Bike Philippines at Navy Standard Insurance.
- Latest
