Davis bumida sa Pelicans; Harden nanguna sa Rockets
LOS ANGELES — Naimintis ni Anthony Davis ang una niyang limang tira at umiskor lamang ng 4 points sa first quarter.
Matapos ito ay nagpakita na ang tunay na Davis.
Kumamada si Davis ng 46 points at 16 rebounds, habang nagdagdag si Julius Randle ng 27 markers para pamunuan ang New Orleans Pelicans sa 121-117 panalo laban sa Clippers.
Naisuko ng New Orleans ang itinalang 20-point lead sa third period, ngunit nakabawi naman sa second half para sa kanilang ikalawang road win ngayong season laban sa isang Western Conference team kagaya ng Los Angeles.
“I was missing some easy shots, but that doesn't discourage me. I just keep shooting the same shots,” sabi ni Davis. “Once I was finding the rhythm they told me to go get the ball.”
Nagtumpok sina Davis at Randle ng pinagsamang 24 sa itinalang 28 points ng Pelicans sa third quarter patungo sa pagtatala ng 20-point advantage.
Ngunit naputol ito ng Clippers sa 88-94 papasok sa fourth period bago tuluyang maagaw ang unahan sa 101-100 mula sa four-point play ni forward Danilo Gallinari.
Isang 15-6 atake naman ang ginawa ng New Orleans para muling makalayo sa Los Angeles sa 115-106.
Sa Houston, humataw si star guard James Harden ng season-high 57 points para sa 112-94 paggiba ng Rockets kontra sa Memphis Grizzlies.
Pinalawig ng reigning NBA MVP ang kanyang pagkamada ng 30-point games sa 17 pagsapit ng halftime kung saan siya tumipa ng 36 points sa first half para ibigay sa Houston ang double-digit lead.
Ito ang pinakamahabang 30-point game streak ng isang player matapos ang 20 ni Wilt Chamberlain noong 1964.
Sa San Antonio, humataw si Kemba Walker ng 33 points at ninamnam ni Tony Parker ang kanyang pagbabalik sa San Antonio matapos talunin ng Charlotte Hornets ang Spurs, 108-93.
Tinapos ng Hornets ang seven-game home winning streak ng Spurs.
Nagtala si Parker ng 8 points, 4 assists at 3 rebounds para sa Charlotte.
Sa New York, humugot naman si guard D’Angelo Russell ng 18 sa kanyang 34 points sa third quarter para akayin ang Brooklyn Nets sa 109-102 panalo laban sa bisitang Boston Celtics.
- Latest