Blackwater sasagupa sa NorthPort; Phoenix makakatapat ang Meralco
Laro Ngayon(Smart Araneta Coliseum)
4:30 p.m. NorthPort vs Blackwater
7 p.m. Meralco vs Phoenix
MANILA, Philippines — Malalaman ng mga koponang pumasok sa trade kung tama ang kanilang mga naging desisyon.
Lalabanan ng Blackwater ang NorthPort ngayong alas-4:30 ng hapon kasunod ang paghaharap ng Phoenix at Meralco sa alas-7 ng gabi sa 2019 PBA Philippine Cup sa Smart Araneta Coliseum.
Sa apat na koponan ay ang Elite ang nagkaroon ng pinakamalaking trade matapos ibigay si 6-foot-8 Poy Erram sa NLEX Road Warriors kapalit nina rookies Paul Desiderio at Abu Tratter.
“It will be a test for Blackwater,” sabi ni coach Bong Ramos sa koponang iginiya niya sa franchise-best na sixth place finish noong 2018 Governors’ Cup. “We will see on what level are we at this stage after the off-season preparation.”
Bukod kay Erram, wala na din sa Blackwater sina guards John Pinto at Paul Zamar dahil sa trade.
Pumirma si Pinto sa Meralco, samantalang lumipat naman si Zamar sa San Miguel.
Maliban kina Desiderio at Tratter, ipaparada rin ng Elite sina rookie Diego Dario at free agents Gelo Alolino at Joseph Eriobu.
Ibabandera naman ng Batang Pier sina rookie Robert Bolick at free agent Jomari Sollano para makatuwang nina Stanley Pringle at Sean Anthony.
Sa ikalawang laro, muli namang sasandalan ng Meralco sina veterans Ranidel de Ocampo, Jared Dillinger at Cliff Hodge katuwang sina Baser Amer at Chris Newsome at kasama sina rookies Trevis Jackson at Kier John Quinto at free agent recruit Gabby Espinas.
“We’re healthy for the first time in four years,” sabi ni coach Norman Black sa kanyang Bolts. “It’s interesting to see how we start this conference and play the entire tourney where we put our best players on the floor.”
Aasahan naman ng Fuel Masters sina shooter Matthew Wright, small forward Calvin Abueva, 2018 PBA Rookie of the Year Jason Perkins, RJ Jazul, JC Intal, Doug Kramer, LA Revilla at Willy Wilson.
“The initial goal is to make the playoffs and we’ll see what we can do from there,” wika ni Phoenix mentor Louie Alas.
Ang Barangay Ginebra ang naglista ng unang panalo sa torneo matapos talunin ang TNT Katropa, 90-79, noong Linggo sa Philippine Arena sa Bocaue, Bulacan.
- Latest