Perez top pick ng columbian
MANILA, Philippines — Walang sorpresang naganap ngayong taon matapos sikwatin ng Columbian Dyip ang inaasahang top pick na si CJ Perez sa ginanap na 2018 PBAAnnual Rookie Draft sa Robinsons Place sa Ermita, Manila.
Kontrapelo ito sa takot at pangamba ng marami na muli nitong ite-trade ang naturang pick gaya ng ginawa nila noong nakaraang taon.
Magugunita na noong 2017 Rookie Draft ay nakuha ng San Miguel ang top overall pick at ginamit ang tsansa upang kunin ang Filipino-German sensation na si Christian Standhardinger.
Sa ngayon, hindi ito nangyari dahil sasandalan ng Columbian ang dating NCAA MVP na si Perez na maging taga-sagip nila lalot’ kagagaling lang nila sa malamyang 6-win season ngayong taon.
“Dream come true para sa akin ito,” ani Perez. “Maipa-pangako ko lang ‘yung best effort ko at sana matulungan ko yung Columbian.”
Tulad nang inaasahan ay napunta rin si Rayray Parks Jr. sa Blackwater bilang second overall pick habang sinikwat ng Northport si Robert Bolick bilang third overall pick.
Subalit, ang NLEX at Meralco ang gumuluntang sa naturang draft nang kumuha ng mga sorpresang pick sa middle rounds.
Ginamit ng Road Warriors ang fourth pick upang siguraduhin ang University of the Philippines legend na si Paul Desiderio habang ang Filipino-American guard sensation na si Trevis Jackson naman ang kinuha ng Meralco bilang fifth overall pick nito. (ADimasalang)
- Latest