PSL tankers kumolekta ng 13 golds sa Hamilton Aquatics swimfest
MANILA, Philippines — Humakot pa ang Philippine Swimming League (PSL) ng 13 gintong medalya tampok ang record-breaking performance ni Micaela Jasmine Mojdeh sa girls’ 12-year division ng 2018 Hamilton Aquatics Winter Long Course Swimming Championships na ginaganap sa Hamilton Aquatics Center sa Dubai, United Arab Emirates.
Nagpasiklab si Mojdeh nang wasakin ang Philippine record sa 200m butterfly mula sa bilis na 2:22.31upang tabunan ang sarili niyang marka na 2:25.82 na naitala noong Pebrero sa 2018 Middle East Open Swimming Championship sa Dubai.
“She’s really improving from time to time. Our training program for our swimmers is really working and we won’t be surprised if she makes it to the Olympics at the very young age. We are so proud of our swimmers,” wika ni PSL president Susan Papa.
Nakasungkit din si Mojdeh, ang Palarong Pambansa most bemedalled athlete, ng gintong medalya sa 100m butterfly (1:05.17), 400m Individual Medley (5:23.49) at 50m breaststroke (36.34).
Hindi rin maawat si Marc Bryan Dula ng Masville Elementary School-Parañaque na nakatiyak ng apat na gintong medalya sa boys’ 11-year 400m freestyle (5:00.85), 50m butterfly (30.37), 100m backstroke (1:11.92) at 50m freestyle (28.00) at pilak sa 200m IM (2:36.71).
Nagdagdag pa si Jie Angela Talosig ng dalawang ginto sa 200m freestyle (2:18.66) at 100m freestyle (1:04.24), at isang pilak sa 50m breaststroke (36.72) sa girls’ 12-year division habang nakahirit ng ginto si John Alexander Talosig sa 400m freestyle (4:23.44) at pilak sa 200m IM (2:20.87) sa boys’ 14-year class.
Sa kabuuan, humakot ang mga PSL tankers ng 27 gold, 22 silver at 5 bronze medals.
Kasama rin sa delegasyon sina coaches Alex Papa, Marlon Dula, Bob Palacios at Virgie de Luna gayundin sina PSL operations manager Stephanie Sablan at PSL NCR director Joan Mojdeh.
- Latest
