Bulacan, Parañaque diretso na sa semis
MANILA, Philippines — Inangkin ng Bulacan at Parañaque ang top two seeds pati na ang outright semifinals berth sa pagtiklop ng eliminations ng National Basketball League (NBL).
Tinalo ng Bulacan Makabayan ang CamSur Express, 98-85 habang tinakasan ng Parañaque Aces ang Laguna Pistons, 81-80 noong Miyerkules at ang Dasmariñas Ballers, 80-77 noong Sabado para kunin ang top two spots sa team standings.
Tinapos ng Bulacan at Parañaque ang eliminations bitbit ang 7-2 baraha kung saan ibinulsa ng Makabayan at Aces ang semifinals outright.
Umiskor sina Dominick Fajardo at Jerick Sumampong ng 22 at 21 points, ayon sa pagkakasunod, para sa panalo ng Bulacan kontra sa CamSur.
Magsisimula ang NBL playoffs bukas sa knockout quarterfinal matches sa Philippine Christian University-Dasmariñas gym kung saan lalabanan ng third-seed Laguna Pistons ang sixth-seed Nueva Ecija Go Bespren sa alas-4 ng hapon at haharapin ng No. 4 CamSur Express ang No. 5 Dasmariñas Ballers sa alas-6 ng gabi.
- Latest