4 Pinay boxers pasok sa second round ng AIBA meet

MANILA, Philippines — Maagang nagparamdam ang mga Pinay bo­xers ma­tapos umusad sa second round ang apat na miyembro sa pagsisimula ng 2018 AIBA Women’s World Boxing Championships sa KD Jadhav Indoor Sta­dium sa New Delhi, In­dia.

Matikas ang simula ni Aira Villegas nang iselyo ang second-round referee-stopped-contest laban kay Shamima Akter ng Bangladesh sa bantamweight (54 kgs) division.

Pasok din sa second round sina dating world champion Josie Gabuco (light flyweight 45-48 kgs.) at Irish Magno (flyweight 51 kgs) na nagtala ng magka­ibang desisyon sa kani-ka­nilang kategorya.

Kumana si Gabuco ng unanimous decision win (29-28, 30-27, 29-28, 30-27, 30-27) kontra kay Eka­te­rina Paltseva, habang na­itakas ni Magno ang 3-2 split decision win kay Ya­na Burym ng Belarus (30-27, 30-27, 30-27, 27-30, 27-30).

Sunod na makakasagupa ni Villegas si Peamwilai Laopeam ng Thailand na nagsumite ng referee-stopped-contest laban kay Omella Havyarimana ng Bu­rundi.

Haharapin naman ni Ga­buco si Wu Yu ng China na namayani kay Chuthamat Raksat ng Thailand, sa­mantalang lalarga si Mag­no kontra kay Chang Yuan ng China na nakasi­guro ng opening round bye.

Masuwerteng nakahirit ng first round bye si da­ting World Championships silver medalist Nesthy Petecio kung saan lalabanan niya si Yeni Marcela Arias Cas­tañeda ng Colombia sa second round ng event na nilahukan ng 66 bansa.