Junior Blazers, Red Robins patayan sa titulo
MANILA, Philippines — Paglalabanan ng nagdedepensang La Salle-Greenhills at Mapua High School ang kampeonato sa paglarga ng rubber match ng NCAA Season 94 juniors basketball tournament ngayong hapon sa Mall of Asia Arena sa Pasay City.
Nakauna ang Junior Blazers nang kunin nito ang 74-69 panalo sa Game 1 noong Nobyembre 6 ngunit naitabla ng Red Robins ang serye matapos itarak ang 85-76 desisyon sa Game 2 noong Lunes para makahirit ng do-or-die.
Muling maghaharap ang La Salle-Greenhills at Mapua sa inaasahang mainit na bakbakan sa alas-2.
Wala si Mapua ace Clint Escamis na nagtamo ng injury sa kaliwang tuhod kaya’t sumandal ang kanilang tropa kina Dan Arches, Paolo Hernandez at Jonnel Policarpio sa kanilang huling laro.
Puntirya ng Red Robins na makuha ang ika-22 kampeonato para mapantayan ang San Beda Red Cubs bilang winningest team sa juniors division
“The player knows we have to win without our bets player and I’m so proud that the team stepped up big in Game Two to give us a chance at winning another championship,” ani Mapua coach Randy Alcantara.
Ito ang ikatlong pagkakataon na nasa rubber match si Alcantara. (CCo)
- Latest
