Adamson tangka ang twice-to-beat
MANILA, Philippines — Puntirya ng Adamson Soaring Falcons na lumapit sa isang hakbang tungo sa twice-to-beat advantage sa Final Four sa pagharap kontra sa nangungulelat na UE Red Warriors habang asam ng UP Fighting Maroons ang solo fourth spot sa pakikipagtagpo laban sa UST Growling Tigers ngayon sa pagpapatuloy ng Season 81 UAAP men’s basketball tournament sa Araneta Coliseum.
Maghaharap ang Soaring Falcons (9-3) at Red Warriors (1-11) sa alas-2 ng hapon at susundan ng laban ng Fighting Maroons (6-6) at Growling Tigers (5-7) sa alas-4 ng hapon.
Kailangan ng Soaring Falcons na magwagi laban sa Red Warriors para makopo ang pang-sampung panalo sa 13 laro at lumapit sa twice-to-beat edge na ayon kay coach Franz Pumaren, isang malaking bentahe sa labanan sa Final Four.
“We are happy to reach the Final Four, but we’ve been doing that for the last two years. Hopefully, we can improve our finish this year,” sabi ni coach Pumaren, hangad ang kanilang pagpasok muli sa semis sa ikatlong pagkakataon sa season na ito.
Sariwa pa rin sa isip ni Pumaren ang kanilang dalawang sunod na semifinal appearances, ngunit dalawang ulit din silang hindi nakaligtas sa mga kamay ng De La Salle Green Archers matapos matalo sa Game 1 pa lamang.
Pinayuhan din ni Pumaren ang kanyang koponan na huwag maging kampante sa laro dahil naghahangad din ang sibak ng Red Warriors ng magandang pagtatapos sa elimination.
Sa una nilang pagharap ay tinambakan ng Adamson ang UE, 90-76 sa first round noong Sept. 19.
- Latest