NLEX sinilat ang Alaska sa bonus

MANILA, Philippines — Kasabay ng pagpapa­lakas sa kanilang tsansa sa quarterfinal round ay ang pagdiskaril ng NLEX sa pagdakma ng Alaska sa ‘twice-to-beat’ incentive.

Nabitawan man ang itinalang 14-point lead sa third period ay bumangon naman ang Road Warriors mula sa 10-point deficit sa fourth quarter patungo sa 116-110 overtime win laban sa Aces sa 2018 PBA Governor’s Cup kahapon sa Ynares Center sa Antipolo City.

Tinapos ng NLEX ang kanilang tatlong sunod na kamalasan para itaas ang 5-5 baraha habang nagwakas naman ang two-game winning run ng Alaska para sa 7-3 marka.

Itinayo ng Road Warriors ang 70-56 abante sa 5:09 minuto ng third quarter hanggang makatabla ang Aces sa pagtatapos ng nasabing yugto 77-77 mula sa pinakawalang 21-7 atake.

Itinala ng Alaska ang 10-point advantage, 94-84 sa 5:40 ng final canto hanggang igiya ni import Aaron Fuller ang NLEX sa extension, 99-99.

Huling napasakamay ng Aces ang abante sa 110-109 mula sa basket ni Chris Banchero sa 1:06 minuto ng laro kasunod ang three-point shot at apat na free throws ni JR Quiñahan para sa 116-110 abante ng Road Warriors sa huling 9.4 segundo.