Dyip nakatikim din ng panalo
MANILA, Philippines — Nagwakas na ang siyam na sunod na kamalasan ng Columbian.
Ito ay matapos humugot si import Akeem Wright ng 11 sa kanyang 23 points sa fourth quarter para tulungan ang Dyip na sagasaan ang Rain or Shine Elasto Painters, 100-84 sa 2018 PBA Governor’s Cup kahapon sa Ynares Center sa Antipolo City.
Naitala ng Columbian ang kanilang kauna-unahang panalo sa season-ending conference habang napigilan naman ang two-game winning run ng Rain or Shine para sa kanilang 2-5 baraha.
Tinalo ng Dyip, tinapos ang 25-game losing slump sa season-ending conference, ang Elasto Painters sa ikatlong sunod nilang paghaharap ngayong taon.
“It feels good. We don’t wanna end the season with an 0-11 record,” sabi ni Wright, nagsalpak ng tatlong three-point shots sa fourth quarter para ibigay sa Columbian ang 16-point lead, 86-70, laban sa Rain or Shine sa huling apat na minuto ng laro.
Pinalobo pa ito ng Dyip sa 91-70 matapos ang triple ni Jerramy King sa huling 3:03 minuto ng final canto.
Hindi na ito nagawang putulin ng Elasto Painters, nakahugot kay import Terrence Watson ng 18 points.
Nauna nang kinuha ng Columbian ang 50-39 abante sa halftime hanggang maagaw ng Rain or Shine, nalagay sa panganib ang hangaring tiket sa eight-team quarterfinal round, ang 54-52 bentahe buhat sa basket ni Watson sa 7:59 minuto ng third period.
- Latest
