PSL tankers lumapit sa overall title sa Tokyo
MANILA, Philippines — Humakot pa ang Philippine Swimming League (PSL) ng 11 ginto, 5 pilak at 5 tansong medalya upang makalapit sa inaasam na overall championship sa 2018 Tokyo Invitational Swimming Championship sa St. Mary’s International School swimming pool sa Tokyo, Japan.
Muling bumandera sa ratsada ng Pilipinas si Aishel Cid Evangelista ng West Manila Christian School nang pagharian ang boys’ 8-under 100m freestyle sa pamamagitan ng record-breaking time na isang minuto at 12.17.
Winasak ni Evangelista ang rekord na 1:14.61 na naitala ni Kei Karamaki noong 1987.
Nauna nang binasag ni Evangelista 25-taong rekord ni Filipino Olympian Miguel Molina sa 25m freestyle (15.79).
Hindi rin maawat si Palarong Pambansa Most Bemedalled Athlete Micaela Jasmine Mojdeh na kumana pa ng isang rekord sa girls’ 11-12 50m butterfly tangan ang 29.91 segundo - sapat para tabunan ang 29.98 na lumang marka ni Yuri Chino noong 1997.
Nag-ambag ng tig-dalawang ginto sina Phency Joyce Bose sa girls’ 15-18 200m backstroke (2:37.88) at 200m freestyle (2:25.13), at Richelle Callera sa girls’ 8-under 25m butterfly (16.71) at 100m freestyle (1:18.07).
May tig-iisang ginto sina Trump Christian Luistro ng Hope Christian School-Legazpi (boys’ 9-10 50m butterfly, 36.28), at General Santos City bets Zaine Franchesca Abao (girls’ 9-10 100m breaststroke, 1:44.49), Ellaiza Nicole Rojo (girls’ 13-14 200m freestyle, 2:21.39), at John Alexander Talosig (boys’ 13-14 200m freestyle, 2:01.23), at ang girls’ 11-12 200m freestyle relay (2:10.08).
“I am extremely happy with the results the kids are getting in the Japan competition. It only proves that our program is on track. We are producing a future world champions and we are thankful to all of the people who supported us. We would like to extend our gratitude to the Filipino community in Japan headed by Myles Beltran and Arnel Punzalan,” ani PSL president Susan Papa. (C.Co)
- Latest