San Juan paborito vs Navotas

MANILA, Philippines — Haharapin ng San Juan Knights ang Navotas Clutch habang magtatagpo rin ang Bacoor Strikers at Pasig Pirates ngayon sa pagpapatuloy ng 2018 MPBL  Datu Cup sa Strike Gym sa Bacoor, Cavite.

Magtatagpo ang Knights at Clutch sa alas-7 ng gabi at susundan agad ng laro ng Bacoor Strikers at Pasig Pirates sa alas-9 ng gabi.

    Paborito ang Knights ni coach Randy Alcantara na magwagi laban sa Clutch para masungkit ang pang-walong panalo at makisosyo sa top spot kasama ang Bataan Risers sa Northern Division.

Ang tanging talo pa lamang ng Knights ay sa mga kamay ng Muntinlupa Cagers, 71-77  noong Agosto 22 kung saan umiskor si Larry Rodriguez ng 14 puntos at pitong rebounds habang si John Wilson ay umani ng 13 puntos at anim na rebounds at 12 naman mula kay Michael Ayon-Ayon.

Sa pagbabalik nina Ron Dennison, Matt Salem at Kris Porter mula sa pagsali sa Asia League Terrific 12 sa Macau, China ay tiyak magpapalakas sa hanay ng Navotas Clutch. (FC)