Dula nanguna sa pagwasak ng 5 record
146th PSL Leg Series
MANILA, Philippines — Limang bagong record ang naitala sa unang araw ng 146th Philippine Swimming League (PSL) – DPS Swim Challenge na ginaganap sa Diliman Preparatory School swimming pool sa Quezon City.
Nanguna sa listahan ng mga record-breakers sina Masville National High School standout Marc Bryan Dula at Immaculate Heart of Mary College-Parañaque bet Micaela Jasmine Mojdeh matapos mamayagpag sa kani-kanilang kategorya sa torneong suportado ng MX3 at DMI Medical Company.
Pinagharian ni Dula ang boys’ 11-year 200m freestyle matapos magtala ng dalawang minuto at 21.31 segundo para tabunan ang kanyang 2:30.65 marka na nirehistro noong Mayo 25.
Hindi naman nagpahuli si Mojdeh na sariwa pa sa matamis na kampanya sa 2018 Batang Pinoy National Finals sa Baguio City kung saan humakot ito ng apat na ginto at isang pilak tampok ang tatlong Batang Pinoy records.
Nangibabaw ang Palarong Pambansa Most Bemedalled Athlete sa girls’ 12-year 100m butterfly sa bilis na 1:05.69 para pagandahin ang kanya ring lumang marka na 1:05.78 noong Hulyo 1.
Bumasag din ng rekord sina Master Charles Janda (boys’ 9-year 200m freestyle, 2:46.22), Marcus Dekam (boys’ 13-year 200m freestyle, 2:06.03), Richelle Anne Raine Callera (girls’ 8-year 50m butterfly, 37.54) sa kani-kanilang paboritong events.
“Our swimmers just keep on breaking records. I am happy to see that our developmental program works. Even in the recent Batang Pinoy, we see more PSL swimmers winning. It is no longer one or two swimmers, but rather many swimmers. I congratulate all of them ,” ani PSL president Susan Papa. (CCo)
- Latest
