Adamson tangka ang ika-3 dikit
MANILA, Philippines — Asam ng Adamson na palawakin sa tatlo ang magandang simula sa pagharap kontra sa UST habang magtatagpo naman ang Ateneo at National University ngayon sa pagpapatuloy ng Season 81 UAAP basketball tournament sa Smart Araneta Coliseum.
Haharapin ng Soaring Falcons ang Growling Tigers sa alas-2 ng hapon at susundan agad ng labanan ng nagdedepensang Blue Eagles at Bulldogs sa alas-4 ng hapon.
Matapos pataubin ang UE Red Warriors (90-76) noong Miyerkules, malakas ang tiwala ng Soaring Falcons na makamit ang ikatlong sunod na panalo at manatili sa solo top spot sa standings.
Ang unang panalo ng tropa ni coach Franz Pumaren ay sa Blue Eagles, 74-70 noong Sept. 9 kung saan humataw si Jerrick Ahanmisi ng 23 puntos at apat na rebounds habang si Vince Magbuhos ay umani ng sampu at siyam na rebounds at walong puntos at 11 rebounds naman mula kay Papi Sarr.
Sa malaking panalo, inspirado ang buong koponan kaya umarangkada si Sean Manganti ng 27 puntos para pangunahan ang panalo laban sa Red Warriors. Bukod kay Manganti, umani rin ng 17 puntos si Ahanmisi at 15 marker mula kay Sarr.
Ngunit, inaasahang iba ang magiging takbo ng laro sa pagtatagpo nila ng Growling Tigers na galing din sa 76-74 panalo laban sa FEU Tamaraws noong Sept. 12 upang makabawi sa 70-75 talo sa NU Bulldogs noong Sept. 8. (FC)
- Latest