Altas, Cardinals humihinga pa
Laro Bukas (The Arena)
10 a.m.- SSCR vs JRU (Jrs)
12 nn.- SBU vs EAC (Jrs)
2 p.m.- SSCR vs JRU (Srs)
4 p.m.- SBU vs EAC (Srs)
MANILA, Philippines — Pinasuko ng University of Perpetual Help System Dalta ang Arellano University, 57-45 upang buhayin ang pag-asa nito sa Final Four ng NCAA Season 94 men’s basketball tournament kahapon sa The Arena sa San Juan City.
Naglatag na naman ng halimaw na laro si Prince Eze matapos umani ng 20 puntos at 19 rebounds para buhatin ang Altas sa ikaanim na panalo sa 11 pagsalang.
Nakakuha si Eze ng suporta mula kina Rey Peralta at Jelo Razon na nagtulong sa pinagsamang 19 markers habang nag-ambag si Jeff Coronel ng walong puntos at anim galing kay Edgar Charcos.
Bumagsak sa 4-7 ang Chiefs.
Ang 45 puntos na produksiyon ng Chiefs ang ikalawang pinakamababang output sa season na ito.
Tanging si Michael Canete lamang ang nagtala ng double figures para sa Chiefs tangan ang 15 markers.
Sinorpresa naman ng Mapua University ang College of Saint Benilde, 86-83 para manatiling buhay ang tsansa nito.
Napigilan ng Cardinals ang matikas na kamada ng Blazers sa second half upang dagitin ang kanilang ikaapat na panalo laban sa walong kabiguan.
Pinamunuan ni Laurenz Victoria ang balanseng atake ng Mapua matapos magtala ng 16 markers, anim na rebounds at anim na assists.
“He’s the most senior of the team that’s why I’m giving him all the confidence to shoot and make the plays when we need it,” ani Mapua mentor Atoy Co patungkol kay Victoria.
Nahulog ang Blazers sa No. 4 spot tangan ang 7-5 marka habang naiwan sa solong ikatlo ang walang larong Colegio de San Juan de Letran (7-4)..
- Latest
